ازاي يكون هدفك من حياتك الجنة؟

أزاي يكون هدفك من حياتك الجنة؟




أنت شاب أو انتِ بنت , أو راجل أو ست




عايز/ عايزة إيه من حياتك؟؟




فلوس , صحة , لعب , مجوهرات , شهرة , شهوة , عريس , عروسة , قصر , فيلا , عربية , موبيل أحدث موديل , شقة على النيل , عزبة , فستان , دنيا بكل اللي فيها




طيب جميل أوي , طيب ما كلنا نفسنا ونفسنا ونفسنا بس في النهاية دي دنيا




والدنيا فانية ومافيش حد حيخلد فيها , كل الحكاية 50 أو 70 او حتى 100 سنة




ماتخافش الموت سهل وجميل للي عايز يعيش عشان الجنة




وخليك خايف ومترقب صعوبة الموت في حالة انك عايش عشان الدنيا واللي فيها طول ما انت مش عامل حساب للحساب يوم القيامة وعذاب ونعيم القبر




ايه دة انت جاي تخوفنا ولا ايه؟؟



لأ طبعا




طيب الكلام دة ايه لزمته؟؟



عشان نعرف احنا عايشيين ليه , وعشان ايه وهدفنا ايه من حياتنا




طيب بس لخص؟



حاضر , والله هلخص جداً




قال الله تعالى " وما خلقت الجن والإنس الا ليعبدون"



ربنا خلقنا عشان نعبده




طيب حنعبد ربنا أزاي ؟



بالصلاة والصوم والزكاه والحج وبس




لأ في كمان بالصدقة



والصدقة يا أما فلوس او ابتسامه في وجه الناس او كلمة طيبة , يعني رد جميل على الناس




وايه تاني ؟؟




الدعاء أعظم أنواع العبادة،{ وَقَالَ رَبُّكُمُ ادْعُونِي أَسْتَجِبْ



لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ } [غافر:60]



طيب وايه تاني بسرعة , كل اللي يرضي ربنا اسمه عبادة لربنا




يعني ممكن نعبد ربنا في كل ثانية من حياتنا وبكل شئ يرضيه؟؟



ايون




طيب ازاي ؟



لما تأكل تحتسب نية انك بتاكل عشان تقدر تطيع ربنا , يعني تصلي يعني تعف نفسك لما تروح شغلك تحتسب نية انك عشان تقدر تعيش



لما تنام عشان تقدر تعمل نفس الحاجات بنية انك بتنام عشان تقدر تطيع ربنا وتقدر تشتغل وتعف نفسك وتعف اهل بيتك عن السؤال



لما تشتغل , لما تذاكر , لما تتعلم , لما تقرأ بينة انك تفيد بلدك وتفيد دينك وتفيد المسلمين , وتفيد نفسك وغيرك




وكتير ماتعدش




يعني ممكن من اول ثانية بعد البلوغ لحد ما اموت آخد ثواب وبرحمه ربنا ادخل الجنة ؟



آه بإذن الله




وشوف وعد ربنا بالجنة لمين؟؟




قال تعالى: ( والذين آمنوا وعملوا الصالحات أولئك أصحاب الجنة هم فيها خالدون)



قال تعالى : ( إن الله اشترى من المؤمنين أنفسهم وأموالهم بأن لهم الجنة يقاتلون في سبيل الله فيقتلون ويقتلون وعدا عليه حقا في التوراة والإنجيل والقرآن ومن أوفى بعهده من الله فاستبشروا ببيعكم الذي بايعتم به وذلك هو الفوز العظيم)




بيع نفسك لربنا , ما انت في الأصل ملك ربنا , بس بيع حياتك واشتري الجنة , اعمل حاجات كويسة ترضي ربنا زور المريض من اهلك او صاحبك , ساعد كل الناس من أول حد من عيلتك وأهلك لحد واحد من الشارع ما تعرفوش , اعطف على اليتيم وخد ثواب كبير , ساهم في جمع تبرعات للمحتاجين , ادعي لأخواتك بظهر الغيب



اشتغل للجنة , واكيد الجنة تستاهل نتعب عشانها حياتنا الصغيرة دي اللي منها يوميا لا يقل عن 7 ساعات نوم و ساعتين اكل و شوف شغل قد ايه لو نعبد فيه برضا ربنا اننا نعامل ربنا في كل ثانية , اننا نتقي ربنا في البيع والشراء ونخدم الناس لو احنا موظفين او لو احنا من اصحاب الحرف مانستغلش الظروف ومانخدش اكثر من اللي نستحقه , وماندبحش الزبون زي ما بيقولوا




قال تعالى: (مثل الجنة التي وعد المتقون تجري من تحتها الأنهار أكلها دائم وظلها تلك عقبى الذين اتقوا وعقبى الكافرين النار)




اتقاء ربنا يعني نعمل كل اللي أمرنا بيه ونبعد عن كل شئ نهانا عنه , وتطبيق سنة رسول الله في تقليد اخلاقه في كل ثانية من حياته , خير دليل على اننا بنطيع ربنا وبنحب ربنا




قال تعالى: ( إلا من تاب وآمن وعمل صالحا فأولئك يدخلون الجنة ولا يظلمون شيئا)



يعني فرصة لينا كلنا نتوب لربنا عن اي ذنب ونعمل الأعمال الصالحة عشان ندخل الجنة برحمه ربنا




قال تعالى : ( تلك الجنة التي نورث من عبادنا من كان تقيا)



يلا احنا مستنين ايه, اتقاء ربنا




قال تعالى : ( وأزلفت الجنة للمتقين)



أزلفت يعني تزينت , يعني بتقرب من المتقين , وبتتزين ليهم استعداداً للقاء الجميل , ها لسه برضة




قال تعالى : ( وتلك الجنة التي أورثتموها بما كنتم تعملون)



ها أعمالنا حتودينا الجنة ولا حتودينا فين؟؟؟





قال تعالى : ( أولئك الذين نتقبل عنهم أحسن ما عملوا ونتجاوز عن سيئاتهم في أصحاب الجنة وعد الصدق الذي كانوا يوعدون)



يارب نكون منهم يارب




قال تعالى : ( لا يستوي أصحاب النار وأصحاب الجنة أصحاب الجنة هم الفائزون)




قال تعالى : ( وبشر الذين آمنوا وعملوا الصالحات أن لهم جنات تجري من تحتها الأنهار كلما رزقوا منها من ثمرة رزقا قالوا هذا الذي رزقنا من قبل وأتوا به متشابها ولهم فيها أزواج مطهرة وهم فيها خالدون)



في أجمل من كدة؟؟




قال تعالى : ( تلك حدود الله ومن يطع الله ورسوله يدخله جنات تجري من تحتها الأنهار خالدين فيها وذلك الفوز العظيم)



اللي يتقي الله ويعرف الإسلام حلل ايه وحرم ايه ويمشي عليه حيدخل الجنة بإذن الله



ويفضل فيها دائما والخلود كما وعد الله , هو اللانهاية




قال تعالى : ( إن المتقين في جنات ونعيم)




الله أكبر , كل ده من إتقاء ربنا بس ؟؟




ده غير أحاديث رسول الله صلى عليه وسلم , اللي فيها حاجات لو عاملها الإنسان يكون من أهل الجنة , ياريت ندور عليها , ونقرأها ونفهمها عشان ملناش غير ربنا , ومانتمناش بعد حياتنا ألا الجنة




واخيرا




ماحدش يقول انا هدفي ابقى دكتور او مهندس او أي حرفة نجار سباك زبال أي شئ




كلنا بنكمل بعض ودي حكمة ربنا نبقى مختلفين في الشغل والأجر و الأرزاق عشان كله يساعد بعضه وكله يكون محتاج لكله , وزي ما ربنا قال للغني يطلع زكاته وقال للي قادر يطلع صدقات وقالنا نعطف ونعامل الناس كويس , كل دة وكل الأهداف دي بتقربك للجنة , لانك لما بتخدم حد او بتعالج حد او بتشيل الأذى من الطريق لحد , أو بتعمل أي شئ بنيه التقرب الي الله سواء كنت طبيب نجار سباك زبال مهندس أي مهنة , فأنت بتقرب من الجنة بإذن الله




طريق ربنا واحد , ونهايته الجنة ,وطريق ربنا سهل جداً لان رب العباد "لايكلف نفساً الا وسعها" يعني ربنا ماكلفناش بحاجة مانقدرش عليها , وكل اللي ربنا كلفنا بيه نقدر عليه , وربنا ريحنا في بعض المواقف عشان مايكونش لينا حجة



زي المسافر او المريض من حقة يفطر اذا كان السفر حيتعبه



او المريض اذا كان المرض بيتعبه اثناء الصوم ويعوض لما يطيب




بعد الموضوع دة يارب يكون هدفك بقى الجنة



من خلال حياتك



حبك لاولادك ولزوجتك



حبك لشغلك ومساعدة الناس



حبك لرب الناس بطاعته وطاعه رسوله



حبك لمذاكرتك وحبك للقراءة تفيد بيها نفسك وبلدك وغيرك



حبك لكل شئ خلقه ربنا



حبك لكل أنواع العبادات , والمداومة عليها زي الذكر




والكلام مابينتهيش





وجزاكم الله خيرا




اللي يقرأ هذا الموضوع مشكورا وجزاه الله خيرا ان ينقله بكل الوسائل وفي كل مكان

جزاك اللة كل خير موضوعك احسن من رائع اتمنا منك المذيد